Nivîskar û derhêner
Şirîk û derhênerê hunerî yê Şermola Performansê
Kordînatorê Beşa Zimanê Kurdî ya Eurodramê (Tora Ewrûpayê ya Wergera Dramayê)
Avakar û editorê kovara Dîalogê
Mîrza Metîn di sala 1980yî de li devera Serhedê ya Bakurê Kurdistanê, li Qaqizmana Qersê ji dayîk bûye. Bi xwe ji sala 1994an û vir ve ye xerîkî berhemhênana şanoyî ye. Wî di Teatra Jiyana Nûyê û Seyrî Meselê de perwerdeya şanoyê girt û di lîstikan de lîst. Di Konserwatiwara Zankoya Teknîkî ya Stembolê (İTÜ) Beşa Dansên Gelêrî de sê salan xwend, di pey re Zankoya Stembolê, Beşa Rexnegirîya Şanoyê û Dramatûrcîyê, Şaxa Zanista Nivîskarîya Dramatîk kuta kir. Mîrza Metîn beşdarî “New Writing Workshops with the Royal Court” bû û salekê li gel nivîskarên her wekî Zinnie Haris û Mark Revenhill û derhêner Richard Twyman xebitî. Di sala 2008an de tevî Berfîn Zenderlîoxlûyê wî Şermola Performans damezirand. Metîn di warê nivîskarîyê, derhênerîyê û ekterîyê de ji alîyê gelek sazîyan ve hate perrûkirin. Mîrza Metîn heta niha 17 heb şanoname nivîsîne û 15 ji wan ji alîyê wî bi xwe ve û ji alîyê derhênerên cîyawaz ve hatine bisehnekirin. Hin şanonameyên wî hatine wergerandin bo zimanên wek Zazakî, Almanî, Îngilîzî, Fransizî, Macarî û Tirkî. Metîn bi têksta Aç Köpeklerê (Kûçikên Birçî) ve hate vexwendin bo “PEN World Voices Playwright Festival” (2017, New York). Têksta Kûçikên Birçî di bijartina 2017an a Komîteya Tirkî ya Eurodramê de yekemînî bi dest ve anî. Bi têksta Rawestgeharafê ve hate vexwendin bo “Welt/Bühne Festival” (2017, Munîx). Her wiha têksta Rawesgeharaf bo “Goethe Institute Theaterbibliothek” hate hilbijartin û bi edîtorî û weşangerîya “Theater der Zeit”ê ve li Almanyayê bi şêweyê dicîtal hate weşandin. Metîn bi şanonameyên xwe yên wek Serencama Qijikan û Panopticonê ve bû beşdarê Festîvala Şanoyê ya Navneteweyî ya Stembolê. Her wiha, Metîn di 2018an de bû bûrswergirê “Akademie Schloss Solitude, Jean-Jacques Rousseau Fellows 2018”ê û di çarçoveya vê bûrsê de bi navê “Dramatûrcîya Êgir” bendek nivîsî û ev bend di kovara bi navê International Theatre Research de belav bû ku yek ji weşanên Zankoya Cambridgeê ye. Têksta wî ya şanonameyê, Dîsko 5 No'lu, ku 9 salan li ser dikê bû, hate hilbijartin bo “An Anthology of Documentary Drama From Turkey"ê.
Mîrza Metîn ev pênc sal e li Almanyayê dimîne û li jêr banê Şermola Performansê wekî nivîskar û derhêner di xebatên xwe de berdewam e. Berhemên wî yên bi Kurdî ji alîyê Weşanxaneya Avestayê ve, yên bo zimanê Fransizî wergerandî jî ji alîyê Maison d'Europe et d'Orient û yên bo zimanê Ingilîzî wergerandî jî ji alîyê Laertes Books ve têne weşandin. Mîrza Metîn nivîskarê kitêbên bi navê Reşê Şevê (ya bi hevkarîya li gel Berfîn Zenderlîoxlûyê hatî nivîsîn), Lîstikên Tomerî 1, Jêrzemîn/Şanoya li Jêrzemînê, Gravité û Ziwsichenhaltê ye. Nivîskar endamê PENa Kurd, PEN Berlîn, VTheAyê (Komeleya Nivîskarên Şanoyê-Almanya) û ITIê (International Theatre Institute) ye.